کرناٹک میں منگل کو بارش سے متعلقہ واقعات میں پانچ افراد ہلاک ہوگئے جب کہ ریاست کے کچھ حصوں میں بارش جاری ہے۔ ہندوستان کے محکمہ موسمیات (آئی ایم ڈی) نے ریاست کے 12 اضلاع میں مزید تین دن کے لیے یلو الرٹ جاری کیا ہے۔ اتر کنڑ ضلع کے بھٹکل تعلقہ کے متلّی گاؤں میں شدید بارش کے بعد پہاڑ سے ایک چٹان کا ایک حصہ ان کے مکان پر گرنے سے ایک ہی خاندان کے چار افراد ہلاک ہو گئے۔ چار افراد کی نعشیں نکالی گئیں اور مرنے والوں کی شناخت لکشمی نارائن نائک (60)، ان کی بیٹی لکشمی (45)، بیٹا اننت نارائن نائک (38) اور بھتیجے پروین رام کرشن نائک (16) کے طور پر کی گئی ہے۔
نیشنل ڈیزاسٹر رسپانس فورس اور اسٹیٹ ڈیزاسٹر ریسپانس فورس کو موقع پر پہنچنے میں مشکل وقت کا سامنا کرنا پڑا کیونکہ مناسب سڑک رابطہ کی کمی تھی۔ اتر کنڑ ضلع میں تقریباً 300 مکانات ڈوب گئے ہیں اور لوگوں کو حکام نے محفوظ مقامات پر منتقل کیا ہے۔ ضلعی انتظامیہ نے سیلاب سے متاثرہ افراد کو خوراک اور رہائش فراہم کرنے کے لیے امدادی مراکز کھولے ہیں۔ ایک اور واقعہ میں کلبرگی ضلع میں ایک بائک سوار سیلاب کے پانی میں بہہ گیا۔ حکام نے سرچ آپریشن شروع کر دیا ہے لیکن ابھی تک نعش برآمد نہیں ہو سکی ہے اور شناخت کا پتہ نہیں چل سکا ہے۔ دارالحکومت بنگلورو میں دن بھر بارش ہو رہی ہے۔