ملک کی قدیم ترین سیاسی جماعت نے اپنے مضبوط جمہوری نظام کا مظاہرہ کرتے ہوئے نئے صدر کا انتخاب کر لیا ہے۔ آج ہونے والی ووٹوں کی گنتی کے بعد جاری کئے گئے نتیجہ کے مطابق صدارتی امیدوار ملکارجن کھرگے نے بڑے فرق سے کامیابی حاصل کی۔کانگریس کے 80 سالہ لیڈر ملکارجن کھرگے نے انتخاب کے دوران 7897 ووٹ حاصل کئے، جبکہ دوسرے امیدوار ششی تھرور کو 1072 ووٹ ہی حاصل کرسکے۔
صدارتی انتخاب کے دوران کل 9385 ووٹ ڈالے گئے گئے، جن میں سے 416 ووٹوں کو منسوخ قرار دیا گیا۔ دوسرے صدارتی امیدوار ششی تھرور نے ملکارجن کھر گے کو جیت کی مبارک باد پیش کی۔ گزشتہ 24 برسوں میں یہ پہلا موقع ہے جب گاندھی خاندان کا کوئی رکن صدارتی عہدے تک نہیں پہنچا۔
اس سے پہلے سیتارام کیسری ایسے صدر تھے جو گاندھی خاندان سے نہیں تھے۔ کانگریس کے صدر دفتر پر کھرگے کی جیت کا جشن منایا گیا اور ان کے حامیوں نے ڈھول کی تھاپ پر شاندار جشن منایا۔دریں اثنا، ششی تھرور نے ملکارجن کھرگے کو جیت کی مبارک باد پیش کی ۔
اور کہا ’’یہ کافی احترام اور اہم ذمہ داری کا عہدہ ہے۔ میں کھرگے جی کو ان کی جیت پر مبارک باد پیش کرتا ہوں۔‘‘ ملکارجن کھرگے کو اس کے علاوہ دیگر پارٹی قائدین نے بھی مبارک باد پیش کی۔