ریاستی وزیر صحت ٹی ہریش راؤ نے کہا کہ کینسر کے مریضوں کا علاج کرنے کے لیے حکومت سالانہ 100 کروڑ روپئے خرچ کررہی ہے ۔ 15 ہزار کینسر مریضوں کا حکومت مفت علاج کررہی ہے ۔ یوم عالمی کینسر کے موقع پر نواب مہدی نواز جنگ کینسر ہاسپٹل نامپلی میں وزیر ہریش راؤ نے سی ٹی اسکیان ، ڈینٹل ایکسرے ، او پی جی ، پیشنٹ ، اٹنڈنسی عمارت کے علاوہ موبائل اسکریننگ گاڑی کا افتتاح کیا ۔ اس موقع پر خطاب کرتے ہوئے ہریش راؤ نے کہا کہ 14 سال قبل قائم کردہ سی ٹی اسکیان ناکارہ ہونے پر 7.16 کروڑ روپئے کے مصارف سے عصری تقاضوں سے لیس سی ٹی اسکیان کو عوام کے لیے دستیاب رکھا گیا ہے۔
کینسر مریضوں کی نشاندہی کے لیے روٹری کلب کے زیر اہتمام ایک کروڑ روپئے کے مصارف سے خریدے گئے موبائل اسکریننگ گاڑی کا بھی افتتاح کیا گیا ہے ۔ سروائیکل ، بریسٹ ، اورل کینسر کی نشاندہی میں یہ موبائل گاڑی معاون و مددگار ثابت ہوگی ۔ انہوں نے کہا کہ نینا راؤ چیارٹیبل ٹرسٹ کے تحت ڈاکٹر گویند راؤ نے تین کروڑ روپئے کے مصارف سے 300 بیڈس پیشنٹ اٹنڈنس بھون تعمیر کیا ہے ۔ 40 لاکھ روپئے کے مصارف سے ڈینٹل ایکسرے او پی جی کا بھی افتتاح کیا گیا ہے ۔ وزیر نے مزید کہا کہ علحدہ تلنگانہ ریاست کی تشکیل کے بعد نواب مہدی نواز جنگ کینسر ہاسپٹل کے بجٹ میں چیف منسٹر کے سی آر نے دو گنا اضافہ کردیا ہے۔
اس ہاسپٹل میں 252 نئی جائیدادیں منظور کی گئی ہیں جس میں 32 ڈاکٹرس 85 اسٹاف نرسیس اور 85 ٹیکنیشنس شامل ہیں۔ مریضوں کی تعداد میں اضافہ کو دیکھتے ہوئے ارابندو فارما کی جانب سے سی ایس آر پروگرام کے تحت 65 کروڑ روپئے کے مصارف سے 300 بیڈس پر مشتمل نیا ہاسپٹل کی تعمیر جاری ہے جو اپریل تک مریضوں کیلئے دستیاب ہوجائے گا ۔ فی الحال 450 بیڈس میں مزید 300 بیڈس کا اضافہ ہوجائے گا۔
نواب مہدی نواز جنگ ہاسپٹل کے قریب میں واقع دو یا تین ایکڑ اراضی کینسر ہاسپٹل کو مختص کرنے کی اپیل کی گئی ۔ اس اراضی کو بھی این ایم جے ہاسپٹل کیلئے مختص کی جائے گی ۔ ہریش راؤ نے کہا کہ نواب مہدی نواز جنگ کینسر ہاسپٹل میں فی الحال تین آپریشن تھیٹرس ہیں ۔ سالانہ 4000 مینر سرجریز 1500 میجر سرجریز کیے جارہے ہیں۔
15 کروڑ روپئے کے مصارف سے مزید 8 عصر سہولتوں سے لیس آپریشن تھیٹرس تعمیر کئے جارہے ہیں ۔ مارچ تک یہ تھیٹرس کی خدمات دستیاب ہوجائے گی۔ اس میں ایک روبوٹک تھیٹر بھی شامل ہے ۔ جس سے 5 ہزار سرجریز کرنے کی گنجائش فراہم ہوگی ۔ وزیر صحت نے عوام کو گٹکھا ، سگریٹ سے دور رہنے کا مشورہ دیا۔