چنڈی گڑھ کی ہرناز سندھو نے مس یونیورس کا خطاب جیت لیا ہے۔ ہندوستان 21 سال بعد ایک بار پھر یہ خطاب جیتنے میں کامیاب ہوا ہے ۔ اس سے قبل 2000 ء میں لارا دتہ نے یہ اعزاز حاصل کیا تھا۔ اُن سے پہلے سشمیتا سین 1994 میں مس یونیورس بنی تھیں۔
پنجاب یونیورسٹی نے اپنی طالبہ ہرناز کو مبارکباد دیتے ہوئے کہا کہ یونیورسٹی کیلئے یہ فخریہ لمحہ ہے۔ 21 سالہ ہرناز نے اسرائیل کے شہر ایلات میں منعقدہ 70ویں مس یونیورس مقابلے میں خطاب جیتا۔ ہرناز کو مس یونیورس 2021ء کا تاج موجودہ مس یونیورس میکسیکو کی اینڈریا میز نے پہنایا۔
ہرناز نے 79 شرکائے مقابلہ پر سبقت لیجاتے ہوئے یہ خطاب اپنے نام کیا۔ مس یونیورس مقابلے میں پیراگوئے کی نادیہ فریرا فرسٹ رنر اپ رہیں جبکہ جنوبی افریقہ کی لالیلا مسوانے سکنڈ رنر اپ قرار پائی۔ اس مقابلے کے آخری مرحلے میں شرکاء سے پوچھا گیا کہ آپ نوجوان خواتین کو موجودہ دور کے دباؤ سے نمٹنے کے لیے کیا مشورہ دیں گی۔جواب میں ہرناز نے کہاکہ آج کی نوجوان نسل جس بڑے دباؤ کا سامنا کررہی ہے،اُس سے مقابلے کیلئے خود پر بھروسہ ہونا ضروری ہے ۔ یہ جاننا کہ آپ منفرد ہیں وہی آپ کو خوبصورت بناتا ہے۔